暹粒套票,暹粒自由行,暹粒酒店,暹粒包車,柬埔寨自由行

暹粒套票,暹粒自由行,暹粒酒店,暹粒包車,柬埔寨自由行

第1晚
出發前一晚,就好似小學生去旅行咁,成晚訓唔著,仲係到諗埋d搞笑野…例如…如果突然無得做落地簽證咁點算…..當然,香港人去柬埔寨係可以做落地簽證。由於旅費有限,小弟選擇係新加坡轉機,由香港飛往新加坡約3小時45分鐘,再由新加坡飛往金邊約1小時55分鐘,由於柬埔寨比香港及新加坡慢一個鐘頭,到達既時候就好似賺左一個鐘!落機時天氣都唔太好,落住雨,金邊國際機場面積唔大,客量小,所以由落機到步出機場所需時間唔多,申請落地簽證時發生左一個小插曲,由於當地人較為貧窮,賄賂問題不時都會發生(但治安絕對唔差!),我與同行友人一齊做簽證,價錢為USD20一位,我地俾錢時表明USD50 For 2 People,理應找返USD10俾我地,但係職員哥哥就好似”忘記”左欠我地USD10,當然正義係必勝,係我地”提醒”之下,佢係一臉不太情願既樣子下找返錢,其實當遇到類似情況,只要你出聲同佢講返,佢都唔會亂黎。一步出機場就已經見到旅館職員手持名牌迎接,當晚用餐後,再同旅館職員、住客傾下計,討論下行就就訓啦!!準備明天正式柬埔寨之旅!!!!

 

第2晚
早上6點幾就被出面既大雨聲嘈醒,正當擔心緊行程會否受影響之際,旅館職員話其實好多時侯都係咁早上落一陣大雨,即刻放心哂~繼續訓多陣!早餐後開始今日行程!!今日行程如下:皇宮→國家博物館→沃翁→中央市場→鍾屋殺人場→S21集中營。

金邊皇宮既建築可媲美北京既故宮,豪華既外觀、精美既修飾,同柬埔寨人民貧窮既生活有一個好大既對比。皇宮內君王殿及銀塔最為壯觀。完成皇宮後,再搭幾分鐘Tuk Tuk就到達國家博物館,紅色既外觀非常醒目,館內收藏量非常豐富,部份展品由吳哥遺跡運到當地收藏。館內禁止影相。下一站係沃翁,沃翁其實係一座建於山上既寺廟,成個環境就好似香港既動植物公園咁,好多當地人都係附近既草地休憩,不過由於係人都入得,所以要注意一下自己既隨身物品。睇左幾個景點,係時侯購下物,刺激下當地經濟,中央市場圓拱型既外殼非常醒目!市場主要出售銀器、手錶、日用品及食物,各個區域壁壘分明。本以為呢種市場會非常焗,但係入到去之後卻係異常地通爽!!一d都唔辛苦。草草地食過午餐,向下一個目的地出發,鍾屋殺人場位於金邊市郊,由中央市場搭Tuk Tuk去大約45分鐘。離開鍾屋殺人場後,出發前往S21集中營,係入面參觀既時候,突然間落起大雨,令整個現在環境更加陰森恐佈。晚上同一直車我地走黎走去既Tuk Tuk司機一齊到地道既餐廳食飯,只可以講一句,好食到爆炸!!食完飯就叫Tuk Tuk司機帶我地去買柬埔寨地道食物 – 炸蜘蛛。我承認,外貌的確唔太討好,但其實味道都唔錯!好似食軟殼蟹!

 

第3晚
一早起身去左金邊最後一個景點 – 俄羅斯市場。同中央市場一樣,市場內各個區域壁壘分明,同中央市場唔同既地方係,呢到較多手工藝品出售,買手信既好地方 ! 幸好我地既旅費有限,所以無係俄羅斯市場逗留太多時間,返到旅館拿拿聲汁好野又要趕出去機場搭飛機去暹粒!! 經過大約40分鐘航程,就由金邊去到暹粒,由於飛行時間比原定既早左15分鐘,所以預定既旅館接送未到…..只好係機場等…..等左無幾耐,笑容滿面既接送司機就出現啦! 暹粒第一個比我既感覺係…比金邊仲要落後!!!事實上亦都係…偶然都會發生停電,好多馬路都只係一條條既泥路,路面亦都有些小凹凸。由機場前往市中乘大約需要30分鐘車程。搞完一大輪Check-in手續後就把握時間去觀光啦!! 今日暹粒唯一既景點就係地雷博物館,由市中心前往乘Tuk Tuk約40分鐘,館內主要講解地雷為當地帶黎既害處,以及清除地雷既工作。由於聽日要開始吳哥之旅,所以今晚要早早休息。

 

第4晚
由於吳哥遺跡非常大,遊覽路線分為小圈、大圈及郊區三個部份,今日既路線就係小圈行程。今日行程如下:吳哥窟→巴戎廟→空中宮殿→塔布隆寺→塔高寺→巴肯山日落

吳哥窟係吳哥遺跡中最為人熟識既一部份,亦係最多遊客既地方。牆壁上有好多好有故事性既雕刻。離開左吳哥窟,就向巴戎廟進發!你可以係巴戎廟見到世界聞名既高棉的微笑,係廟內無論邊一個位置你都會見到高棉的微笑,就好似國王高高在上咁觀察緊你咁。好多人都會擔心吳哥遺跡內會無野食,但係其實係各大寺廟附近都會有餐廳,如果唔知食咩會安全d,建議你食炒飯最為穩陣。當我地等緊野食黎,有好多小朋友把握時間埋黎售賣紀念品。有d都幾特別,但係當我地想話買夠唔要就麻煩d…有小小令人覺得煩…..

午餐後就去睇位於附近既大吳哥王城,係又用左一大堆相機記憶之後,就去左塔布隆寺,塔有隆寺最為人熟悉既地方就「盜墓者羅拉」其中一個拍攝場地,係呢到又遇到好多旅行團….塔高寺,就好似佢個名一樣….真係好高,上塔既人都要手腳並用咁爬上去…離開左塔高寺後,就出發去巴肯山擺定靚位睇日落!! 完成今日小圈旅程,回程時係暹粒老市場落左車搵野食,老市場可以話係暹粒既市中心,老市場後面既餐廳、酒吧非常之多,好多遊客都係多飲野傾下計。但由於聽日要睇日出要4點要起身,所以都係拿拿聲訓….

 

第5晚
今日行程係大圈:Preah Khan → 龍蟠水池 → Ta Som → East Mebon → Banteay Kdei → 變身塔

唔知點解,雖然係4點鐘起身,但係1d都唔眼訓,一路上都有各種大大小小既車向著同一個目的地,吳哥窟出發。請原諒我無係到對日出多作介紹,因為我實在搵唔到有d咩字可以形容到!! 由於時間尚早,我相信我地係今日第一個Preah Khan既遊客,Preah Khan 係古時候既學院,圖書館。龍蟠水池,由於10月仲係雨季,所以入去既時間要先行過一條獨木橋。 Ta Som,一個較細既廟,有一支保育遺跡隊伍係到進行既修復,變物塔為古時皇室既火葬場。亦係其中一個遊客熱門睇日落既地方 – Banteay Kdei – 由於今日一早就出發,好早就完成左大圈,所以決定下晝去洞里薩湖遊覽。洞里薩湖同柬埔寨既關係就好似泰國同湄公河既關係一樣,你可以係洞里薩湖經洞里薩河搭船去金邊。

 

第6晚
今日既行程係近郊既遺跡,呢d遺跡既歷史比吳哥王城仲要耐。今日行程如下:女皇宮 → 洛羅寺 → 神牛寺 → 巴孔寺

由市中心出發約45分鐘就到達女皇宮,女皇宮以3D雕刻聞名於世,離開女皇宮,經過1個半鐘既車程,終於到達洛羅寺,洛羅寺係早期既寺廟之一,建築材料以磚頭為主,神牛寺同洛羅寺一樣以磚頭建成,最特別係有三隻神牛坐立係到,巴孔寺,一個好大型既寺廟,本來計劃係到睇日落,但發現即使上到最高點,都係俾樹遮住…所以只好放棄,打道回府。由於聽日所餘下既時間並唔多,所以決定狂刷手信!!同金邊一樣,各個售賣工藝品既商店都會將貨物開個高既價錢,所以絕對有殺價既餘地,當然,用一個輕鬆幽默既態度去討價還價,你可能會得到一個你估唔到既結果,亦都會發現佢地食水都幾深下……

 

第7晚
完成最後檢查之後,就去辦理check-out同向各位友善既職員道別,又再經歷左一段空中旅程,又返到熟悉既香港,突然由小村莊,變成大城市,老實講,有小小唔慣,整個行程我最深刻既感覺係,你唔出去旅行闖蕩過,你唔會知道當地人係幾咁友善,幾咁樂於助人,我諗呢個就係自由行同旅行團既分別……