昨晚本來8點鐘收工,諗住覆埋幾位客人嘅電話查詢先走,差不多8點半左右,有一對夫婦突然走入黎,話想查詢幾日後出發嘅新加坡package,咁我未熄電腦就一定幫佢做埋。

客人好坦白,因為樓上樓下嘅旅行社已經休息先會入黎問(如果你有睇開呢個同事專欄,都知道我地做開十六號愛人),我用左45分鐘介紹左佢想要嘅Package,過程都好愉快。第46分鐘開始,一講到俾錢,就用左另外嘅90分鐘同我講有關牌子大小嘅問題(係呀,毎日都要面對嘅問題)。

最開頭都係講,驚俾左錢之後就執笠(我通常都會話TIC 印花稅就係保障番客人呢個問題)。講番轉頭,係呢度做野,我開始明白一件事,點解咁多大商場都會係一式一樣嘅鋪頭,因為呢個問題真係日日都有人提醒你至少一次。不過,今次講講下有少少唔同。

客:你服務真係好俾心機,解答又好詳盡,不過我對你公司好冇信心,不如你去樓上個幾間大公司度做,我一定幫襯你。

蜜:多謝你讚我,其實我就係你講個d 大公司出黎嘅。

客:咩咁大打擊有大公司唔做,做呢度。

蜜:我同幾個至同道合嘅朋友,已經厭倦左大公司嘅包袱,諗住出黎闖下,而家唔試,以後都未必再有機會。你覺得我服務好,何不給我呢間你認為嘅細公司一個機會呢?

客:對唔住,我見隔離左右都收左工先黎問你,呢個package 我唔會買,不過我好欣賞你服務態度,不如你黎我公司做秘書啦!

135分鐘之後,我先發現,呢對夫婦原來唔係搵新加坡package,係想搵一個秘書,呢樣野我真係幫唔到。

沙田分行 ~ Emily